جب بچہ پیدا ہوتا ہے تو کان میں اذان کیوں دی جاتی ہے؟

 سوال نمبر 1431

السلام علیکم ورحمت الله وبرکاته

کیا فرماتے ہیں علمائے کرام اس مسئلہ میں کہ جب بچہ پیدا ہوتا ہے تو اس کے کان  میں اذان کیوں دیجاتی ہے  اس کی وجہ کیا ہے جواب عنایت فرمائیں 

المستفتی محمد اسرار احمد  بلرام پور یوپی      

---

وعلیکم السلام ورحمت الله وبرکاته

  بسم اللہ الرحمن الرحیم 

الجواب بعون الملک الوہاب

بچہ کے کان میں اذان اسلئے دی جاتی ہے کہ بلائیں دور ہوجائیں  حدیث شریف میں ہے کہ بچہ کے پیدائش کے وقت شیطان چونکا مارتا ہے جس کی وجہ سے بچہ چیخ مار کر روتا ہے 

عن ابی ھریرۃ قال قال رسول الله ﷺ  صیاح المولود حین یقع نزغۃ من الشیطن (متفق علیہ

(مشکوۃ المصابیح ص ١٩)

یعنی زمین پر گرتے وقت بچہ کی چیخ شیطان کی چونک سے ہے 

اور دوسری حدیث پاک میں یہ ہے 

عن ابی ھریرۃ قال قال رسول الله ﷺ  مامن بنی آدم مولود الا یمسه الشیطان حین یولد فیستھل صارخا من مس الشیطان غیر مریم وابنھا (متفق علیہ)

(مشکوۃ المصابیح ص ١٩ )

یعنی کوئی آدمی ایسا نہیں جسے پیدائش کے وقت شیطان چھوتا نہ ہو  وہ بچہ شیطان کے چھونے سے ہی چیختا ہے  سوائے مریم اور ان کے فرزند کے  

اور اذان دافع بلا ہے اور شیطان خود بہت بڑی بلا بچہ کے پاس آنا دوسری بلا، چونک مارنا تیسری بلا، 

خلاصہ یہ ہے کہ بعد ولادت اذان کہہ کر شیطان کو بھگا دیا جاتا ہے  کیوں کہ حدیث شریف میں ہے کہ اذان کی آواز سن کر شیطان چھتیس میل دور گوز مارتا ہوا بھاگتا ہے 

اور بچہ کے کان میں اذان دینا سنت رسول الله ﷺ بھی ہے جیسا کہ حضور صدرالشریعہ بدرالطریقہ حضرت علامہ امجد علی اعظمی علیہ الرحمہ  ابوداؤد کتاب الادب کے حوالے سے تحریر فرماتے ہیں 

کہ ابوداؤد و ترمذی ابو رافع رضی اللہ عنہ سے راوی کہتے ہیں 

کہ جب امام حسن بن علی رضی اللہ تعالی عنہما پیدا ہوئے تو میں نے دیکھا کہ حضور اکرم ﷺ نے ان کے کان میں وہی اذان کہی  جو نماز کے لئے کہی جاتی ہے 

اور اسی کے نیچے تحریر فرماتے ہیں  

کہ بہتر یہ ہے کہ داہنے کان میں چار مرتبہ اذان اور بائیں میں تین مرتبہ اقامت کہی جائے 

بہت لوگوں میں یہ رواج ہے کہ لڑکا پیدا ہوتا ہے تو اذان کہی جاتی ہے اور لڑکی پیدا ہوتی ہے تو نہیں کہتے یہ نہ چاہئے بلکہ لڑکی پیدا ہو جب بھی اذان و اقامت کہی جائے 

بہار شریعت ،ح ١٥،ص ٣٥٥ دعوت اسلامی

والله تعالی اعلم بالصواب

            کتبه

محمد فرقان برکاتی امجدی

٣٠/جمادی الآخر ١٤٤٢ھ،،١٣/فروری ٢٠٢١ء