باپ، بیوی اور ایک بیٹا میں ترکہ کیسے تقسیم ہو؟

سوال نمبر 2004

 السلام علیکم و رحمۃاللہ و برکاتہ

 کیا فرماتے ہیں علمائے کرام مسئلہ ذیل کے بارے میں کہ زید کا انتقال ہوا اس کا ایک باپ ایک بیوی ایک بیٹا چھوڑا تو کس کو کتنا ملے گا

 المستفتی :- محمد اکبر عالم پورنیہ بہار

وعلیکم السلام ورحمةاللہ وبرکاتہ 

 الـجـــــوابــــــــــ بعــــون المـــلک الــــوھــابــــــــ

 صورت مسئولہ میں میت کے ترکہ سے ترتیب وار کل چار طرح کے حقوق متعلق ہوتے ہیں ۔

اول۔۔ اس کے مال سے میت کی تجہیز وتکفین کی جاۓ ۔

دوم ۔ اس کے مال سے میت دیون ادا کئے جائیں ۔

سوم ۔ اس کے تہائی  مال سے میت کی  وصیت پوری کی جاۓ ۔ 

چہارم ۔ اس کے بعد بچے ہوۓ مال و جائداد میں سے میت ورثہ کے درمیان میراث تقسیم کی جاۓ ۔

جیساکہ فتاوی عالمگیری جلد  ٦ صفحہ  ٤٤٧ میں ہے

التَّرِكَةُ تَتَعَلَّقُ بِهَا حُقُوقٌ أَرْبَعَةٌ: جِهَازُ الْمَيِّتِ وَدَفْنُهُ وَالدَّيْنُ وَالْوَصِيَّةُ وَالْمِيرَاثُ. فَيُبْدَأُ أَوَّلًا بِجَهَازِهِ وَكَفَنِهِ وَمَا يُحْتَاجُ إلَيْهِ فِي دَفْنِهِ بِالْمَعْرُوفِ،ثُمَّ بِالدَیْنِ ثُمًّ تُنَفَّذُ وَصَايَاهُ مِنْ ثُلُثِ مَا يَبْقَى بَعْدَ الْكَفَنِ وَالدَّيْنِ إلَّا أَنْ تُجِيزَ الْوَرَثَةُ أَكْثَرَ مِنْ الثُّلُثِ ثُمَّ يُقَسَّمُ الْبَاقِي بَيْنَ الْوَرَثَةِ عَلَى سِهَامِ الْمِيرَاثِ،)

اھ ملخصا ۔

 صورت مسئولہ میں بعد تقدیم ماتقدم وانحصارورثہ فی المذكورين زید کے جائداد منقولہ وغیرمنقولہ کے کل چوبیس حصہ کئے جائیں ۔ 

اس میں سے آٹھواں حصہ یعنی تین حصے  میت کی بیوہ کو ملیں گے ۔

ارشادباری تعالی :۔

،،فَاِنْ  كَانَ  لَكُمْ  وَلَدٌ  فَلَهُنَّ  الثُّمُنُ  مِمَّا  تَرَكْتُمْ  مِّنْۢ  بَعْدِ  وَصِیَّةٍ  تُوْصُوْنَ  بِهَاۤ  اَوْ  دَیْنٍؕ-،،  

پھر اگر تمہارے اولاد ہو تو ان کا تمہارے ترکہ میں  سے آٹھواں  جو وصیت تم کر جاؤ اور دَین نکال کر،

(پارہ  ٤ سورہ النساء آیت میراث  ١٢ )

اور چھٹا حصہ یعنی چار حصے باپ کو ملیں گے۔

وَ  لِاَبَوَیْهِ  لِكُلِّ  وَاحِدٍ  مِّنْهُمَا  السُّدُسُ   مِمَّا  تَرَكَ  اِنْ  كَانَ  لَهٗ  وَلَدٌۚ-،،

اور میت کے ماں  باپ میں ہر ایک کو اس کے ترکہ سے چھٹا اگر میت کے اولاد ہو ۔

(پارہ ٤ سورہ النساء  آیت   ١١ )

اور پھر بقیہ سترہ حصے مرحوم زید کے بیٹے کو ملیں گے ۔۔

مسئلہ چوبیس 24 سے ہوگا ۔ 

باپ کوملےگا ۔۔۔۔۔۔۔۔۔۔۔۔۔۔۔ 4

بیوہ کوملےگا ۔۔۔۔۔۔۔۔۔۔۔۔۔3

لڑکےکوملےگا ۔۔۔۔۔۔۔۔۔۔۔۔۔۔17

وھوسبحانہ تعالی اعلم بالصواب 

کتبه 

العبد ابوالفیضان محمد عتیق الله صدیقی فیضی یارعلوی ارشدی عفی عنہ

دارالعلوم اھلسنت محی الاسلام 

بتھریاکلاں ڈومریاگنج سدھارتھ نگر یوپی .

المتوطن :۔ کھڑریابزرگ پھلواپور گورابازار سدھارتھنگر یوپی ۔

٦     رجب المرجب         ١٤٤٣ھ

٨          فروری              ٢٠٢٢ء