کیا تفسیر قرآن میں ہندوستانی زبان ہے؟

سوال نمبر 456

السلام علیکم ورحمتہ اللہ 

علمائے ذوی الاحترام اس مسئلہ کے بارے میں کیا فرماتے ہیں کہ زید اور بکر تفسیر قرآن پر بحث کر رہے تھے زید نے کہا کہ قرآن میں ہندوستانی زبان کے بعض الفاظ آئے ہیں 

کیا زید صحیح کہتا ہے رہنمائی فرماکر عنداللہ ماجور ہوں 

سائل محمد نسیم گونڈوی

---

وعلیکم السلام ورحمتہ اللہ وبرکا تہ

 الجواب بعونہ تعالیٰ زید کا قول صحیح ہے چنانچہ نویں صدی کے مجدد اعظم شیخ المحققین علامہ امام جلال الدین سیوطی علیہ الرحمہ تحریر فرماتے ہیں کہ امام ابو شیخ نے حضرت جعفر بن محمد رحمتہ اللہ تعالیٰ علیہ سے اور انہوں نے اپنے والد سے روایت کیا ہے کہ اللہ تعالی کے اس فرمان یآرض ابلعی میں ابلعی ھندوستانی لفظ  ہے اور اس کا معنی ہے اشربی یعنی پی جا 

اور علامہ ابن جریر اور ابو شیخ نے حضرت سعید بن مسجوح علیہ الرحمہ سے روایت کیا ہے فرماتے ہیں کہ طوبی ھندوستانی زبان میں جنت کا نام ہے  اور شیزلہ نے ذکر کیا ہے کہ سندس ھندوستانی زبان میں باریک ریشمی کپڑے کو کہتے ہیں :: رسائل امام سیوطی صفحہ ۹۷ 

لھذا ان روایات سے معلوم ہوتا ہے کہ قرآن مجید میں ھندوستانی زبان کے الفاظ وارد ہیں

واللہ تعالیٰ ورسولہ اعلم بالصواب 

طالب دعا حقیر عجمی محمد علی قادری واحدی 

۲۹محرم الحرام ۱۴۴۱ھجری