طلاق مغلظہ کے بعد بیوی کے ساتھ رہنا کیسا

سوال نمبر 458

السلام علیکم و رحمتہ اللہ تعالیٰ و برکاتہ 

کیا فرماتے ہیں علمائے کرام اس مسئلہ میں کی زید نے اپنی بیوی کو طلاق مغلظہ دے دیا ہے پھر بھی زید اس کے ساتھ رہتا ہے تو کیا اس صورت میں زید کے ساتھ کھانا پینا کرنا درست ہے؟؟؟؟

---

وعلیکم السلام ورحمتہ اللہ وبرکاتہ

بسم اللہ الرحمن الرحیم 

الجواب بعون الملک الوہاب ھوالھادی الصواب
  طلاق مغلظہ کے بعد اب بغیر حلالہ اس عورت کو رکھنا حلال نہیں جیسا کہ ارشاد ربانی ہے

 فَاِنۡ طَلَّقَهَا فَلَا تَحِلُّ لَهٗ مِنۡۢ بَعۡدُ حَتّٰى تَنۡكِحَ زَوۡجًا غَيۡرَهٗ

ترجمہ پھر اگر تیسری طلاق اسے دی تو اب وہ عورت اسے حلال نہ ہوگی جب تک دوسرے خاوند کے پاس نہ رہے (سورہ بقرہ آیت ۲۳۰)

زید مطلقہ بیوی کو رکھنے کے سبب گناہ کبیرہ کا مرتکب ہوا اس لئے اس کے گھر کھانا پیناجائز نہیں  زید پر لازم ہے کہ اس عورت کو اپنے سے دور کردے اور سچے دل سے علانیہ توبہ کرے اور دوبارہ اس طرح غلطی نہ کرنے کا وعدہ کرے بعد توبہ کار خیر کرے کہ کار خیر توبہ میں معاون  ہوتےہیں جیسا کہ ارشاد ربانی ہے

 اِلَّا مَنۡ تَابَ وَ اٰمَنَ وَ عَمِلَ عَمَلًا صَالِحًا فَاُولٰٓئِکَ یُبَدِّلُ اللّٰہُ سَیِّاٰتِہِمۡ  حَسَنٰتٍ ؕ وَ کَانَ  اللّٰہُ  غَفُوۡرًا  رَّحِیۡمًا﴿سورہ فرقان ۷۰﴾

ترجمہ مگر جو توبہ کرے اور ایمان لائے اور اچھا کام کرے تو ایسوں کی برائیوں کو اللہ بھلائیوں سے بدل دے گا اور اللہ بخشنے والا مہربان ہے.

بعد توبہ کھانے پینے میں حرج نہیں.

 التائب من الذنب کمن لاذنب لہ (الحدیث)

اور اگر بیوی کو دور نہ کرےتو سارے مسلمان ملکر اسکا بائیکاٹ کریں جیسا کہ قرآن شریف میں ہے 

وَ اِمَّا یُنۡسِیَنَّکَ الشَّیۡطٰنُ  فَلَا تَقۡعُدۡ بَعۡدَ  الذِّکۡرٰی  مَعَ الۡقَوۡمِ  الظّٰلِمِیۡنَ﴿سورہ انعام ۶۸﴾

 ترجمہ اور جو کہیں تجھے شیطان بھلادے تو یاد آئے پر ظالموں کے پاس نہ بیٹھ

حلالہ کاطریقہ یہ ہے کہ مطلقہ عورت عدت گزار کر کسی سنی صحیح العقیدہ مسلمان سے شادی کر لے اورشوہرثانی جماع بھی کرےکما فی الحدیث العسیلة پھر جب وہ طلاق دے دے یا اسکا انتقال ہوجائے تو پھر دوبارہ عدت گزار کر شوہر اول سے نکاح کر سکتی ہے

مطلقہ حائضہ غیرآئیسہ عورت کی عدت تین کامل حیض ہے اور اگر حاملہ ہے تواسکی عدت وضع حمل ہے

واللہ اعلم با الصواب 

کتبہ

الفقیر تاج محمد حنفی قادری واحدی

۳۰/محرم الحرام ۱۴۴۱ھ 

۳۰/ستمبر۲۰۱۹ء بروز پیر