مسجد کا دروازہ بند کر کے نماز پڑھنا کیسا

سوال نمبر 811

السلام علیکم ورحمت اللہ 

مسجد کا دروازہ بند کرکے نماز پڑھنا کیسا ہے زید کہتا ہے نماز نہیں ہوتی حوالے کے ساتھ جواب عنایت فرما ئیں 

سائل 

توصیف رضا بنگال

---

وعلیکم السلام ورحمتہ اللہ وبرکاتہ

مسجد کا دروازہ بند کرکے نماز پڑھنے میں کوئی حرج نہیں سوائے نماز جمعہ وعیدین کے پنج وقتہ نمازوں کے لئے اذن عام شرط ہی نہیں اس لئے زید کا مطلقاً کہنا کہ مسجد کا دروازہ بند ہونے کے سبب کوئی نماز نہیں ہوتی یہ سراسر غلط ہے

البتہ صحت نماز جمعہ  کے لئے اذن عام کی شرط ہے اس کے بغیر جمعہ صحیح نہ ہوگا

فقہائے احناف نےصحت جمعہ کے لئے چھ شرطیں ذکرکی ہیں ان میں سے چھٹی شرط اذن عام ہے اذن عام کا معنی ہے لوگوں کو عام اجازت ہوکہ جن کا جمعہ صحیح ہوتا ہے ان میں سے کسی کو نماز جمعہ کی جگہ سے روکا نہ جائے-

  عامۂ کتب فقہ

ردالمحتار میں ہے:الأذن العام اى ان ياذن للناس اذناعامابان لايمنع احداممن تصح منه الجمعة عن دخول الموضع الذى تصل فيه -(ج:٣،ص:٢٥،باب الجمعة)

موجودہ صورتحال میں چونکہ ابھی حکومت کی طرف سے مسجد میں اکٹھا ہونے کی پابندیاں ہیں کہ وبا پھیلی ہوئی ہے ملک میں اب اگر ایسی صورت میں لوگ جمع  ہوں مسجد میں تو قانونی طور پر امام وذمہ داران مسجد پرسخت کاروائی ہوتی ہے اس کے پیش نظر موجودہ فقہاء نے اپنی اپنی رائے دلائل وبراہین کےساتھ پیش کی ہے جن میں سے دو نامور  مفتیوں کا فتوی نظر سے گزرا

(١)سراج الفقہاء مفتی محمد نظام الدین مصباحی دامت برکاتہم العالیہ نے درمختار کی عبارت "فلايضرغلق باب القلعة لعدو الخ"سے دروازہ بند کرکے جمعہ کی صحت پر استدلال فرمایاہے

(٢)مفتی شمشاد احمد مصباحی دامت برکاتہم العالیہ نے اس عبارت کے پیش نظر فرمایا ہے کہ اس عبارت میں علامہ شامی صاحب فرما رہے ہیں کہ قلعہ کا دروازہ بند ہونے سے پہلے ان تمام لوگوں کو آنےکی اجازت ہوتی تھی جو نماز جمعہ کےلئے  آناچاہتےتھے(اورسب آجاتے تھے) نمازیوں پردروازہ بندنہیں تھابلکہ نماز کےوقت دشمنان اسلام کے حملے کے خوف سے قلعہ کادروازہ بند کیا جاتا،اس لئے وہاں دروازہ بند ہونا اذن عام کےمنافی قرارنہ پایا،جبکہ مسئلہ دائرہ میں پانچ نمازیوں کے سوا باقی نمازیوں پردروازہ بند کر دیا جاتا ہے،دروازہ بند ہونے سے پہلے بھی تمام نمازیوں کو مسجد میں آنےکی اجازت نہیں دی جاتی ہے بلکہ بعض مساجد میں دروازے کی کنڈی بھی لگادی جاتی یہ ضرور اذن عام کےمنافی ہے اس لئے مسئلہ دائرہ کاالحاق قلعہ والےمسئلہ کےساتھ صحیح نہیں

ان کے قول کاخلاصہ یہ ہے کہ اگرحاکم کاخوف ہوتوجمعہ فرض ہی نہیں لوگ اپنے اپنے گھروں میں ظہرکی نماز پڑھیں

سراج الفقہاء کے قول کاخلاصہ یہ ہے کہ اذن عام ہماری طرف سے ہے یہ پابندیاں حکومت کی جانب سے ہے جس طرح وہاں دشمن کے خوف سےقلعہ کادروازہ بندہوتاتھاآج یہاں حکومت کےخوف  سےبندکیاجاتااورانتظامیہ کی طرف سے روکاجارہاہے موجودہ صورتحال میں ہماری طرف سے اذن عام ہے لہذا چارپانچ لوگ نمازجمعہ اداکرسکتےہیں 

دونوں حضرات کے فتوں کےبعد فقیرکا خیال اب اس نتیجے پر ہے کہ ہم مسلمانوں کوحکومت کےانتظامی احکام کوعمل میں لانا ضروری ہے مخالفت کرکےاپنی عزت خطرہ میں نہ ڈالیں اور نمازوں کے سلسلہ میں خود کواتناہی مکلف سمجھیں جتناآپ کی وسعت ہے ارشاد ربانی ہے"لايكلف الله نفساالاوسعها"اس لئے لوگ اپنے اپنے گھروں میں ظہرکی نماز اداکریں اور جتنے لوگوں کو مسجد میں جانےکی اجازت ہے وہ مسجد میں نماز جمعہ اداکریں اس طرح کہ مسجد کےکسی ایک دروازے کی کنڈی کھلاچھوڑدیں نماز وخطبہ کےوقت

شہرمیں لوگ نماز جمعہ ہونےکےبعدتنہاتنہاظہرپڑھیں

اور دیہات میں جمعہ جہاں قائم ہےبندنہ کریں البتہ ظہرباجماعت واقامت اب بھی پڑھیں باجماعت پڑھنےمیں اگراندیشۂ فتنہ نہ ہو ورنہ جیساممکن ہوکہ  جماعت سےپڑھیں یاتنہا جمعہ سےپہلے یابعد اس لئے کہ دیہات میں نمازجمعہ ہے ہی نہیں

واللہ تعالیٰ اعلم

کتبہ

محمد ابراہیم خان امجدی قادری رضوی بلرامپوری
خطیب وامام غوثیہ مسجد بھیونڈی مہاراشٹر