لوہے کا نعلین پاک ٹوپی یا پگڑی میں لگا کر نماز پڑھنا کیسا؟

سوال نمبر 708

اَلسَلامُ عَلَيْكُم وَرَحْمَةُ اَللهِ وَبَرَكاتُهُ‎

 کیا فرماتے ہیں علماۓ دین ومفتیان شرع متین اس مسٸلہ میں کی زید نعلین پاک جوکہ لوہا یا کوٸی اور دھاتو سے بنا ھے اسکے اوپر شیشے کا نگ لگا ھوا ھے اسے اپنی ٹوپی میں لگا کر امامت کرتا ھے بکر نے اعتراض کیا کہ  چاندی کے علاوہ وہ بھی ساڑھے چار ماشہ تک کی انگوٹھی جاٸز ھے اسکے علاوہ کوٸی چیز جاٸز نہیں اس لٸے اسے لگا کر نماز پڑھنا پڑھانا درست نہیں اگر نہیں تو نعلین پاک لگا کر جو نماز ادا کی گٸی اسکے بارے میں شریعت کا کیا حکم ھے قرآن وحدیث کی روشنی میں جواب عنایت فرمائیں؟

المستدعی محمد اکرم رضا نظامی

---

وعلیکم السلام و رحمۃ الله و برکاته

الجواب بعون المک الوہاب

صورت مسئولہ میں بکر کا نعلین مبارک  ٹوپی میں لگانے کے تعلق سے اسے چاندی کی انگوٹھی پر  قیاس کر نا ہر گز درست نہیں بلا کراہت نماز ہوجائے گی_ 

 نعلین مبارک پگڑی یا کپڑے میں لگا سکتے ہیں اور اس میں اللہ و رسول کا نام بھی لکھ سکتے ہیں_

 جیسا کہ فتاوی فقیہ میں ہےکہ 

جس دھات پر نقش نعلین شریفین بنا ہوا ہو اس کو ٹوپی یا کسی پارچہ میں آویزاں کرکے نماز پڑھ سکتے ہیں اور وہ ہرگز چین دار گھڑی کے حکم میں نہیں ہے

لہٰذا جب نقش نعلین شریفین کو ٹوپی یا کسی پارجہ میں آویزاں کریں گے تو وہ اس کے تابع ہوجائے گا اس صورت میں نماز پڑھنا بلا کراہت جائز ہے اس لئے کہ تابع متبوع کے حکم میں ہے -

درمختار مع شامی جلد دوم صفحہ 616 میں ہے محقق علی الاطلاق شیخ عبد الحق محدث دہلوی رضی المولی تعالٰی عنہ تحریر فرماتے ہیں کہ :

داخل متوضا را باید کہ چیزے کہ  دروے نام خدا و رسول خدا و قرآن ست باخود نہ برود . و در بعض شروح گفتہ کہ ایں شامل ست اسمائے تمام انبیاء صلوات اللہ علیہم اجمعین -

یعنی بیت الخلا میں داخل ہونے والے کو چاہیے کہ ایسی چیز جس میں خدا و رسول کا نام لکھا ہو یا قرآن کا کوئی کلمہ ہو تو اپنے ہمراہ نہ لے جائے . اور بعض شروح میں کہا گیا کہ یہ حکم تمام انبیائے کرام علیہم السلام کے اسمائے مبارکہ کو بھی شامل ہے

 (اشعۃ اللمعات جلد اول صفحہ 201)

اور جس طرح نعلین شریفین کی تعظیم لازم ہے اسی طرح ان کے نقوش کی بھی تعظیم ضروری ہے کیونکہ تعظیم و توہین کے سلسلہ میں جو حکم اصل کا ہے وہی حکم نقوش کا بھی ہے -

اعلٰی حضرت امام احمد رضا محدث بریلوی رضی اللہ تعالی عنہ تحریر فرماتے ہیں کہ :

علمائے دین نے نقشے کا اعزاز و اعظام وہی رکھا ہے جو اصل کا رکھتے ہیں

 فتاوی رضویہ جلد نہم نصف اول صفحہ 150

ایسا ہی  فتاوی فقیہ ملت جلد اول صفحہ 182 پر ہے

واللہ تعالیٰ اعلم باالصواب

    کتبـــہ 

محــــمد معصــوم رضا نوری

منگلور کرناٹک انڈیا

۲۳ جمادی الآخر ١٤٤١ھ

+918052167976