سورہ توبہ کے شروع میں بسم اللہ الرحمن الرحیم کیوں نہیں؟

 سوال نمبر 1423

السـلام علیکـم ورحمةالله وبرکاتہ

قرآن پاک میـں ہر سورت کے شروع میـں بسم اللہ ہے لیکن سورة التوبہ کے شروع میـں بسم الله نہیـــــــں ہے اس کی کیا وجہ ہے برائے کرم رہنمائی فرمائیں

المستفتی ازہر نورانی دولت پور

---

وعلیکم السلام ورحمتہ الله وبرکاتہ

بسم اللّٰہ الرحمٰن الرحیم

الجواب بعون الملک الوھاب

 قرآن کریم کی ہر سورت کے ساتھ بسم اللّٰہ الخ نازل ہوئی اور حضور اکرم صلی الله عليه وسلم نے کاتب وحی کو ہر سورت سے پہلے اسکے لکھنے کا حکم فرمایا لیکن سورہ توبہ کے ساتھ بسم اللّٰہ الخ شریف نازل نہیں ہوئی اس لیے حضور انور صلی صلی الله عليه وسلم نے کاتب وحی کو اس کے لکھنے کا حکم نہیں فرمایا حضرت مولی علی کرم اللہ وجہ الکریم سے روایت ہے کہ بسم اللّٰہ الرحمٰن الرحیم امان ہے اور سورۃ توبہ تلوار کے ساتھ امان اٹھا دینے کے لیے نازل ہوئی اس لیے قبل سورہ توبہ بسم اللّٰہ الخ شریف نہیں 

مستدرک کتاب التفسیر تفسیرسورۃ التوبہ

اور حضرت علامہ سید آل رسول حسنین میاں برکاتی مارہروی مدظلہ العالی والنورانی بخاری شریف کے حوالہ سے تحریر فرماتے ہیں 

قرآن مجید کی تمام سورتوں کی ترتیب خود حضور صلی الله عليه وسلم نے فرمائی تھی سواے سورۃ انفال کے کہ اس سورت کو سورۃ اعراف کے بعد سورۃ توبہ سے پہلے حضرت عثمان غنی رضی اللّٰہ عنہ نے اپنے اجتہاد سے رکھا نیز سورہ توبہ سے قبل بسم اللّٰہ الخ نہیں لکھی گئی یہ بھی آپ کا اجتہاد تھا پھر بعض صحابہ کرام علیھم الرضوان نے آپ سے دو سوال کیے 

ایک سورۃ اعراف و سورۃ توبہ کی آیات کے متعلق دوسرا ہر سورت سے پہلے بسم اللہ الخ ہے سورۃ توبہ سے قبل کیوں نہیں لکھی تو حضرت عثمان غنی رضی الله تعالٰی عنہ نے اسکی کئ وجوہات بیان فرمائے ان میں سے ایک وجہ کا خلاصہ یہ ہے اس میں مجھے اشتباہ پیدا ہو گیا تھا کہ سورۃ توبہ سورۃ انفال ایک ہی سورہ ہے یا دو نیز سورۃ انفال کے مضامین سورۃ توبہ سے ملتے جلتے ہیں اس لیے حضور اکرم صلی الله علیہ وسلم نے اسکی ترتیب نہیں فرمائی ان وجوہ سے میں نے انفال و توبہ کو ملا دیا اور ایک ہونے دو ہونے کا لحاظ کرتے ہوئے نام الگ الگ رکھے اور بیچ میں تسمیہ شریف نہ لکھی 

بخاری شریف تفسیر روح المعانی 

ماخوذ، کیا آپ جانتے ہیں ص ۷۳۲؃ باب معلومات کتب سماوی

مصنفہ حضرت علامہ سیدآل رسول حسنین میاں برکاتی مارہروی مدظلہ العالی

         کتبہ 

العبد ابوالثاقب محمد جواد القادری واحدی لکھیم پوری