سورہ یاسین کا کتنا ثواب ملتا ہے؟

 سوال نمبر 1454

السلام علیکم و رحمۃ اللہ وبرکاتہ 

کیا فرماتے ہیں علمائے دین و مفتیان شرع متین مسئلہ ذیل کے بارے میں زید کہتا ہے کہ سورہ یاسین ایک مرتبہ پڑھنے پر دس ختم قرآن کریم کا ثواب ملتا ہے اور دس ختم قرآن مجید کے 300 سو پارے کا ثواب ملتا ہے اب اگر ایک سورہ یاسین پڑھکر 300 سو پارے کا ثواب کسی کو ایصال ثواب کریں تو درست ہے یا نہیں؟ 

حوالے کے ساتھ جواب عطا فرمائیں نوازش ہوگی 

المستفتی۔اسیرحضور تاج الشریعہ محمد عارف قادری بازار پوروہ قیصر گنج ضلع بہرائچ شریف یوپی

---

وعلیکم السلام و رحمۃ اللّٰہ و برکاتہ

بسم اللّٰہ الرحمٰن الرحیم

الجواب بعون الملک الوھاب زید کا کہنا بالکل درست ہے کہ ایک بار سورہ یٰس پڑھنے پر دس بار قرآن مجید پڑھنے کا ثواب ملتا ہے اور یقیناً ایک بار سورہ یٰس شریف پڑھنے سے تین سو(٣٠٠) پارے کا ثواب ملتا ہے لیکن یہ بعینہ تین سو پارہ نہیں ہوتا ہے فقط تین سو پارے کا ثواب ملتا ہے یہ سورہ یاسین کی خصوصیت ہے لہٰذا سورہ یٰس کی تلاوت سے حاصل شدہ ثواب کو کسی بھی سنی صحیح العقیدہ مسلمان کو ایصال ثواب کیا جا سکتا ہے لیکن سورہ یاسین پڑھ کر تین سو پارے کا ایصال ثواب نہیں کیا جاسکتا ہے بلکہ جو آپ نے پڑھا ہے وہی ایصال ثواب کریں اللہ تعالٰی بہتر جزا عطا فرمانے والا ہے۔

 جامع الترمذی میں یہ حدیث موجود ہے حضرت انس بن مالک رَضِیَ اللہ تَعَالٰی عَنْہُ سے روایت ہے، سرکارِ دو عالَم   صَلَّی اللہ تَعَالٰی عَلَیْہِ وَاٰلِہٖ وَسَلَّمَ   نے ارشاد فرمایا  ہر چیز کے  لئے قلب ہے اور قرآن کا قلب سورۂ  یٰسٓ ہے اور جس نے سورہ ٔ  یٰسٓ  پڑھی تو  اللہ  تعالٰی اس کے لئے دس بار قرآن پڑھنے کا ثواب لکھتا ہے۔ 

(ترمذی، کتاب فضائل القرآن، باب ما جاء فی فضل یس،  ۴ / ۴۰۶ ، الحدیث:  ۲۸۹۶

بحوالہ صراط الجنان سورہ یٰس

  واللہ تعالیٰ اعلم بالصواب

             کتبہ 

محمد عمران قادری تنویری عفی عنہ