شوہر بیوی چھہ بھائی تین بہن میں وراثت کی تقسیم

 سوال نمبر 2533

السلام علیکم ورحمۃاللہ وبرکاتہ 

کیا فرماتے ہیں علمائے دین و مفتیان شرع متین اس مسئلہ میں کہ بیوی کا انتقال ہوا اولاد نہیں شوہر اور بیوی کے چھ بھائی تین بہن حیات ہیں کس کو کتنا ترکہ ملے گا ؟ 

المستفتی  محمد جاوید دیانہ شیوار 

وعلیکم السلام ورحمۃ اللہ وبرکاتہ

الجواب بعون الملک الوھاب

صورت مسئولہ میں برصدق مستفتی بعد تقدیم ماتقدم علی الارث وانحصار ورثہ فی المذکورین مرحومہ کے کل مال متروکہ منقولہ وغیرمنقولہ تیس( ٣٠ ) حصے کئے جائیں گے جس میں سے نصف (آدھا)  یعنی پندرہ  (١٥) حصہ شوہر کو دیا جائے گا ۔ 

ارشاد باری تعالیٰ وَ لَكُمْ  نِصْفُ  مَا  تَرَكَ  اَزْوَاجُكُمْ  اِنْ  لَّمْ  یَكُنْ  لَّهُنَّ  وَلَدٌۚ اور تمہاری بیویاں  جو چھوڑ جائیں  اس میں  سے تمہیں  آدھا ہے اگر ان کی اولاد نہ ہو (پارہ ٤ سورہ النساء آیت ١١/١٢ ۔ )

اور باقی بچے پندرہ حصے تو اس میں سے دو ، دو ہر ایک بھائی کو ملے گا اور ایک ، ایک  ہر ایک بہن کو دیا جائے گا ۔ 

ارشاد باری تعالیٰ وَ اِنْ كَانُوْۤا اِخْوَةً رِّجَالًا وَّ نِسَآءً فَلِلذَّكَرِ مِثْلُ حَظِّ الْاُنْثَیَیْنِؕ-یُبَیِّنُ اللّٰهُ لَكُمْ اَنْ تَضِلُّوْاؕ-وَ اللّٰهُ بِكُلِّ شَیْءٍ عَلِیْمٌ۠ (۱۷۶)

اور اگر بھائی بہن ہو مرد بھی اور عورتیں  بھی تو مرد کا حصہ دو عورتوں  کے برابر۔  اللّٰہ (عزوجل) تمہارے لئے صاف بیان فرماتا ہے کہ کہیں  بہک نہ جاؤ اور  اللّٰہ   (عزوجل) ہر چیز جانتا ہے۔  ( پارہ٦ ، رکوع ٤  سورہ النساء:آیت ١٧٦ ۔ ) 

مسئلہ ٢ × ١٥=  ٣٠ تصحیح ۔

شوہر ۔۔۔۔۔۔۔۔۔۔۔۔۔۔١٥

بھائی ۔۔۔۔۔۔۔۔۔۔۔۔۔۔٢

بھائی ۔۔۔۔۔۔۔۔۔۔۔۔۔۔٢

بھائی ۔۔۔۔۔۔۔۔۔۔۔۔۔۔٢

بھائی ۔۔۔۔۔۔۔۔۔۔۔۔۔۔٢

بھائی ۔۔۔۔۔۔۔۔۔۔۔۔۔۔٢

بھائی ۔۔۔۔۔۔۔۔۔۔۔۔۔۔٢

بہن۔۔۔۔۔۔۔۔۔۔۔۔۔۔۔۔۔۔١

بہن۔۔۔۔۔۔۔۔۔۔۔۔۔۔۔۔۔۔١

بہن۔۔۔۔۔۔۔۔۔۔۔۔۔۔۔۔۔۔١

وھوسبحانہ تعالیٰ اعلم بالصواب 

كتبه 

العبد ابوالفیضان الحاج محمد عتیق اللہ صدیقی فیضی یارعلوی ارشدی عفی عنہ ۔ 

مقام کھڑریابزرگ پھلواپور پوسٹ گورا بازار ضلع سدھارتھ نگر یوپی ۔